So jeit, wenn ehrlöch böst! von Fritz Klabustrijkeit
De Koarlke, e Bowke von säwe-acht Joahr, jeiht änne Schoal. So om Sejersch tie häbbe se Paus. Möt e ganze Schwauks andre Jonges steiht oak mien Koarlke väre Schoaldähr oppe Stroat on bekickt söck dem Eselsfoarwerk utem Dährgoarde. Oawer wie so Jonges sönd -: se kunne doch de beide Esels nöch tofräde loate. De eene poksert dem eene Esel möttem Knöppel mank de Karmenoad, de andre träckt emm anne Oahre, de drödde steiht em mötte Fäht!
De Dährgoarde-Foahrmann, wo e Aend wieder anne Aeck stund, kräj dat doch nu mötte Wut to doahne, datt de verfluchtje Jonges siene Eels op so e Oart quäle. .He rennt hön, de Kräte wechtoschichre. Wie oawer de Junges kicke, datt de Foahrmann kähm, doa nähme se aller Rietut, on rennde rön önne Schoal. Aller wäre scholdöch, wiel se aller tosamme de beide Esels jequält hadde.
Bloßich ons Koarlke, de hadd nöch mötjemoakt! He hadd de beide Esels nöch jeschloage, ook nöch jepoksert. On wiel he doch nu e reinet Jewisse hadd, doa blöw he ook stoahne, wie de Foahrmann ankähm. Oawer ons Foahrmann, wo nu doachd, datt ons Koarlke ook to de Missetäters jehäre deiht, kräj em biem Schlafittke, on dasseld em eenem. Ons Koarlke fung nu an to bälke; öm volle Bälkes rennd he äwer dem Schoalhoff on jroads dem Härr Lehrer, wo jroad Oppsicht hadd, önne Oarme. De ärjert söck, datt de krätsche Jong so doll roahre deiht, on wie de Koarlke vor Jriene em op sien Froage nöch jliek Ant-wort jäwe kunn, doa dasseld he em ook noch e poar runner!
Koarlke rennt nu, ömmer öm volle Bälke, önne Schoal rön. Doa kähm graods sien Klasselährer, wo em nu froage dehd, watt em schoad. Oawer Koarlke kunn nuscht nöch sägge. He moßd bloßich jriene onn jriene. Dem Klasselährer fung datt nu ook an to ärjre, onn he befoahl nu dem Koarlte, em Antwoart to jäwe. Oawer Karlke kunn noch ömmer nöch. De Klasselährer lejd söck dat nu opp siene Oart als Bockichkeit ut on dasseld em ook e poar runner.
Nu wär ganz ut! Koarlkes Stämm äwerschloach söck foorts vör Bälke. Wie he nu wedder rut rennt, rennt he graods dem Herr Rekter önne Oarms. Dat wär nu e önnsöchtjer Härr. He streicheld dem Koarlke on sächt to em, he sull söck doch man beruhje on vertälle, wejen wat he so jriene deiht, Aendlich kräj ons Koarlke möt väl Schlochze rut: „Härr Rekter, de Härr Lange oppe Schoalhoff onn ook ons Härr Klasselehrer häbbe mie beide e poar väre Frät jeschloage, on öck häbb doch de beide Esels nuscht nöch jedoahne!“……………. Riiiitz- kräj he noch e poar jedasselt!
Aus: „Aecht Ostpreißisch“
herausgegeben 1937 vom Sturmverlag Gmbh., Zweigniederlassung Insterburg
